Молдова ҳукумати МДҲдан чиқиш жараёнини бошлади

Кишинёв Молдованинг Мустақил Давлатлар Ҳамдўстлигига (МДҲ) аъзолиги асосини ташкил этувчи учта асосий шартномани денонсация қилиш (бекор қилиш) жараёнини бошлади.

Бу ҳақда кеча мамлакат Ташқи ишлар вазири Михай Попшой “Radio Moldova” эфирида баёнот бериб, ушбу келишувлар тўхтатилганидан кейин Молдова расман ва юридик жиҳатдан “МДҲ таркибига кирмаслигини” таъкидлади. Ваҳоланки, амалда (де-факто) мамлакатнинг ташкилотдаги аъзолиги “бир қанча вақт олдин” тўхтатилган эди.

Бош вазир ўринбосари ва Молдова ТИВ раҳбари гап 1993 йил 22 январда Минскда имзоланган МДҲ Устави, 1991 йил 8 декабрдаги МДҲни ташкил этиш тўғрисидаги Битим ҳамда ушбу Битимга 1991 йил 22 декабрда илова қилинган Протокол ҳақида кетаётганига аниқлик киритди.

Попшойнинг сўзларига кўра, денонсация жараёни аллақачон кетмоқда ва Парламент депутатлари янги сессия бошланиши билан тегишли ҳужжатларни кўриб чиқадилар.

“Эҳтимол, февраль ойининг ўрталарига келиб ҳукуматдаги жараёнларни якунлаймиз, шундан сўнг қарор Парламент томонидан қабул қилинади”, — дея вазир сўзларидан иқтибос келтиради Молдова давлат ахборот агентлиги — “Молдпресс”.

Попшой Молдованинг МДҲга аъзолиги тўғрисидаги шартномаларнинг бекор қилинишини “мамлакатнинг Европага йўналишини мустаҳкамлашдаги муҳим қадам” деб атади.

Молдова вазирининг аниқлик киритишича, Молдова Республикаси МДҲ доирасида жами 283 та шартнома имзолаган; улардан 71 таси аллақачон бекор қилинган, яна 60 га яқини денонсация жараёнида. Шу билан бирга, унинг сўзларига кўра, Кишинёв мамлакатнинг Европа курсига зид бўлмаган, иқтисодий фойда келтирадиган ёки фуқаролар учун амалий аҳамиятга эга бўлган келишувлардан воз кечиш ниятида эмас.

Аввалроқ Молдова Президенти Майя Санду, агар тегишли референдум ўтказилса, ўз мамлакатининг Руминияга қўшилиши учун овоз беришга тайёрлигини билдирган эди. Давлат раҳбари ўз позициясини мамлакатни Россия томонидан бўладиган босимдан ҳимоя қилиш истаги билан асослаган.