Эпштейн терговида Клинтонлар жуфтлиги учун кутилмаган зарба

АҚШ Вакиллар палатасининг Назорат қўмитаси, Жеффри Эпштейн тергови доирасида кўрсатма беришни рад этган собиқ президент Билл Клинтон ва унинг рафиқаси Хиллари Клинтонни “судга итоатсизлик”да айбдор деб топди. Ушбу қарор эҳтимолий жиноий таъқиб учун иш ҳужжатларини Адлия вазирлигига юборишга йўл очади.

Республикачилар кўпчиликни ташкил этувчи Вакиллар палатасининг Назорат қўмитаси, Клинтонлар жуфтлигининг терговда кўрсатма беришдан бош тортгани сабабли уларни “судга итоатсизлик” бўйича жавобгарликка тортиш юзасидан овоз берди.

Овоз бериш натижаларига кўра, АҚШнинг 42-президенти Билл Клинтон 8 га қарши 34 овоз билан, унинг рафиқаси ва собиқ Давлат котиби Хиллари Клинтон эса 15 га қарши 28 овоз билан “судга итоатсизлик”да айбдор деб топилди. 26 нафар республикачи ва 18 нафар демократ аъзодан иборат қўмитада демократ конгрессменларнинг Клинтонлар жуфтлигига қарши овоз бергани диққатни тортди.

Қўмитанинг ушбу қарори итоатсизлик бўйича хулосаларни эҳтимолий жиноий иш очиш учун АҚШ Адлия вазирлигига юбориш ёки юбормаслик масаласини Вакиллар палатасининг умумий йиғилишида овозга қўйишга имкон беради.

Конгресс томонидан ўтказилаётган терговларда чақирувга итоат этмаслик бир йилгача озодликдан маҳрум қилиш билан жазоланиши мумкин.

Билл ва Хиллари Клинтонлар 13 январь куни Эпштейн иши бўйича Конгрессда олиб борилаётган тергов доирасида ўзларига юборилган чақирувга амал қилмасликларини ва кўрсатма беришга бормасликларини эълон қилган эдилар.

Назорат қўмитаси раиси, республикачи Жеймс Комер Клинтонлар жуфтлиги кўрсатма беришга келмаган тақдирда, уларга нисбатан “Конгрессга итоатсизлик” айблови билан даъво қўзғатишини билдирган эди.

Энг кичиги 14 ёшда бўлган 18 ёшга тўлмаган ўнлаб қизларга нисбатан жинсий зўравонлик қилиш ва фоҳишалик тармоғини йўлга қўйишда айбланган Эпштейн, 2019 йил 10 август куни Нью-Йоркнинг Манхэттен шаҳридаги Метрополитен марказий қамоқхонасида ўлик ҳолда топилган эди.

Эълон қилинган Эпштейн иши ҳужжатларида шаҳзода Эндрю, АҚШ Президенти Дональд Трамп, собиқ президент Билл Клинтон, Исроилнинг собиқ Бош вазири Эҳуд Барак, АҚШнинг собиқ вице-президенти Эл Гор, актёр Кевин Спейси, хонанда Майкл Жексон, иллюзионист Дэвид Копперфильд, адвокат Алан Дершовиц ва Нью-Мексико собиқ губернатори Билл Ричардсон каби машҳур шахсларнинг номлари қайд этилган.

АҚШ Федерал қидирув бюроси (ФҚБ) эса Адлия вазирлиги билан ўтказилган текширув натижасида машҳур шахслардан иборат “мижозлар рўйхати” сақлангани ҳақида ҳеч қандай далил топилмаганини маълум қилди. Шунингдек, амалдорлар, машҳурлар ва тадбиркорларнинг жиноятларига шерик бўлгани учун воқеани ёпиш мақсадида ўлдирилгани иддао қилинган Эпштейннинг аслида ўз камерасида ўз жонига қасд қилгани ҳақидаги хулосани эълон қилди.