Исроил қийин аҳволда қолди

Исроилда армиянинг аскарларга бўлган эҳтиёжи ва ультра-ортодоксал яҳудийлар (Харедийлар) ўртасидаги кескинлик кўчаларга чиқди. Ҳарбий хизматдан қочганларни қўлга олиш операциялари қайта бошланганидан сўнг, юзлаб Харедийлар Ғарбий Қуддуснинг асосий кириш йўлларини тўсиқлар билан ёпиб қўйдилар.

Исроилнинг “Kanal 12” телеканали берган маълумотларга кўра, ҳарбий хизматга қарши бўлган намойишчилар Ғарбий Қуддусга транспорт қатновини таъминловчи стратегик кўприкда тўпланиб, ҳаракатни тўхтатиб қўйганлар.

Ҳибсга олинган шерикларининг озод этилишини талаб қилаётган намойишчилар ва полиция ўртасида кескинлик кучайди. Шунга ўхшаш ҳолатлар кеча Голда Меир чорраҳасида ҳам кузатилган бўлиб, намойишчилар ва хавфсизлик кучлари ўртасида шиддатли тўқнашувлар келиб чиққан эди.

Бошқа томондан, кеча Аскалан шаҳрида Харедий талабаларнинг ҳибсга олинишига норозилик билдириш учун тўпланган юзлаб намойишчилар ҳарбий полиция қўмондони бригада генерали Юваль Яминнинг уйи деворларидан ошиб ўтиб, боғига киришган.

Исроил Бош штаб бошлиғи Эяль Замир март ойида берган баёнотида, аскарлар сонидаги жиддий етишмовчилик туфайли армия қийналаётганини ва Харедийларнинг ҳарбий хизматга олинмаслиги армия салоҳиятига салбий таъсир кўрсатаётганини таъкидлаган эди.

Тахминан 10 миллион аҳолига эга Исроилда Харедийлар аҳолининг қарийб 13 фоизини ташкил этади. Харедийлар диний таълимни рўкач қилиб, ҳарбий хизматни ўташдан бош тортиб келишмоқда.