Қалбаки пул тармоғи фош этилди

Испанияда қалбаки евро савдоси билан шуғулланганликда гумон қилинган шахс қўлга олинди. Гумонланувчи Европа бўйлаб юзлаб қалбаки жўнатмаларни амалга оширгани ва ўз уйида босмахона лабораториясини ташкил қилгани маълум бўлди.

Испания полицияси ўз уйида қалбаки евро банкнотларини ишлаб чиқариб, уларни Европанинг турли мамлакатларига юборганликда айбланаётган шахсни ҳибсга олди.

Октябрь ойида Австриядан келган хабар асосида бошланган тергов ҳаракатлари давомида, “darknet” (махфий тармоқ) орқали крипто-валюта эвазига қалбаки пул олди-сотдиси амалга оширилгани аниқланди. Гумонланувчи Испания жанубидаги Малага шаҳрида фаолият юритгани белгиланди.

Полиция қалбаки банкнотлар, айниқса, Германия бошлиқ бутун Европа бўйлаб турли мамлакатларга юборилганини фош этди. Почта жўнатмалари қалбаки шахсий ҳужжатлардан фойдаланган ҳолда амалга оширилгани ва жами 500 дан ортиқ пакетнинг изи топилгани эълон қилинди.

Гумонланувчининг уйида ўтказилган тинтув чоғида тўлиқ жиҳозланган қалбаки пул ишлаб чиқариш лабораторияси топилди. Тезкор тадбир давомида босма машиналар, голограмма ишлаб чиқариш ускуналари ҳамда 20, 50 ва 100 евролик банкнотларни сохталаштириш учун мўлжалланган материаллар мусодара қилинди.

Шунингдек, операция давомида қиймати тахминан 28 минг 350 еврога тенг бўлган қалбаки банкнотлар қўлга олингани билдирилди. Тергов кенгайтирилиб, жиноий тармоқнинг халқаро алоқалари ўрганилаётгани қайд этилди.