Япониядаги зилзила оқибатида 13 киши ҳалок бўлди

Япония жануби-ғарбида, Кюсю минтақасида содир бўлган 7,1 магнитудали зилзила оқибатида 13 киши ҳалок бўлди. Жабрланган ҳудудларда бинолар ва кўприклар харобага айланди.

Нашрнинг хабар беришича, Кумамото префектурасидаги зилзила Япониянинг сейсмик жадаллик шкаласи бўйича 7 баллга - энг юқори даражага етди. Японияда бундай жадалликдаги охирги зилзила 2024 йилнинг янги йил кунида Ното ярим оролида қайд этилган эди.

Япония бош вазири Такаичи Санаэ Кумамотодаги бир қатор эр силкинишлари оқибатида 13 киши ҳалок бўлганини, яна 31 киши тан жароҳати олганини маълум қилди.

Япония метеорология агентлиги одамларни янги кучли зилзилаларга тайёр туришга чақирмоқда.

“Келгуси бир ҳафта ёки шу атрофида, айниқса, яқин икки-уч кун ичида максимал сейсмик жадаллиги 7 балл бўлган эҳтимолий зилзилаларга тайёр туришни тавсия этамиз” дейилади идора хабарида.

Зилзиладан сўнг Кумамото шаҳрига қўшни бўлган Касима шаҳридаги савдо марказида портлаш юз берди. У ерда икки киши ҳалок бўлди.

Маҳаллий полиция маълумотларига кўра, портлашдан олдин 200 га яқин харидорлар, ходимлар ва бошқа шахслар савдо мажмуасидан эвакуация қилинган.

Зилзила Яцусиро шаҳридаги “Nippon Paper Industries” корхонасида мўрининг қулашига ва бошқа варобаликларга олиб келди. У ерда икки киши ҳалок бўлди, яна тўққиз киши бедарак йўқолган деб ҳисобланмоқда.

Шаҳардаги кўприкда йўл қопламасининг қулаши ҳам юз берди, бунинг оқибатида кўприк бўйлаб транспорт ҳаракатининг имкони қолмади.

Минтақа шифохоналарига жароҳат олган 130 дан ортиқ киши келтирилди.

“Kyushu Electric Power Company” компанияси ўз веб-сайтида маълум қилишича, маҳаллий вақт билан чоршанба куни эрталабки соат 7:30 ҳолатига кўра, Кумамото префектурасида 37 000 га яқин хонадон электр энергиясиз қолган.