12 давлат Исроил посёлкаларидан товарлар импортини тақиқлади

Асосан Европа давлатларидан иборат 12 та мамлакат Иордан дарёсининг ғарбий соҳилидаги Исроил посёлкаларига қарши савдо санкциялари киритилганини эълон қилди. Гап ушбу посёлкаларда ишлаб чиқарилган товарлар импортини тақиқлаш ҳақида бормоқда.

Бундай қарорни Буюк Британия, Дания, Исландия, Испания, Ирландия, Канада, Норвегия, Польша, Португалия, Финляндия, Франция ва Чехия қабул қилди.

Қўшма баёнотда “Исроил ҳукуматининг ғарбий соҳилдаги ҳаракатлари икки халқ учун икки давлат барпо этиш ечимини амалга ошириш имкониятини пучга чиқармоқда”, дейилади.

Ҳужжатда, шунингдек, “посёлка аҳолиси томонидан содир этилаётган мислсиз зўравонлик даражаси” қайд этилган.

Буюк Британия ташқи ишлар вазири Эд Милибэнд посёлка аҳолисини очиқдан-очиқ террорчилар деб атади ва уларни ғарбий соҳилда этник тозалаш ишларини олиб боришда айблаб, Исроил ҳукумати бунга кўз юмётганини билдирди.

Исроил ташқи ишлар вазири Гидеон Саар Буюк Британиянинг Қуддусдаги бош консулхонасини ёпиш бўйича кўрсатма берди ва Милибэнднинг баёнотини кескин танқид қилди.

“Бугун Британия парламентида ташқи ишлар вазири томонидан янграган айбловлар — инсофдан ташқари ёлғон”, деди у.

Санкциялар тўғрисидаги қарор Исроил ҳукумати ғарбий соҳилда 1200 га яқин уй қуриш учун тендерлар эълон қилганидан сўнг қабул қилинди. Бу ҳолат халқаро ҳамжамият ва инсон ҳуқуқлари ташкилотларининг кенг эътирози ҳамда қоралашига сабаб бўлди.

БМТ нуқтаи назаридан, Иордан дарёсининг ғарбий соҳилида яҳудийлар посёлкаларини қуриш ноқонуний ҳисобланади.

2026 йил май ойида Венгрия ўз ветосини бекор қилганидан кейин Европа Иттифоқи Исроил посёлкачиларига қарши санкцияларни маъқуллаган эди.