Албаниядаги тартибсизликлар

Албания пойтахти Тиранада душанба куни шиддатли тўқнашувлар авж олди: намойишчилар полицияга Молотов коктейллари, фейерверклар ва тошлар отди, ҳуқуқ-тартибот ходимлари эса сув сепгичлар, кўздан ёш оқизувчи газ ва пластик ўқлар билан жавоб қайтарди.

Махсус топшириқли полиция бўлинмалари кўчалар бўйлаб олдинга силжиётган бир пайтда, акция иштирокчилари чиқинди қутиларига ўт қўйишди.

Тартибсизликлар коррупциядан ғазабланиш, университетлардаги шароитларни яхшилаш талаблари ва бош вазир Эди Рамани истеъфога чиқишга чақириқлар туфайли юзага келган бир неча ойлик ҳукуматга қарши намойишлар фонида содир бўлмоқда.

Рама намойишчиларни “қизил чизиқ”ни босиб ўтганликда айблаб, намойишлар ватандошларнинг ҳуқуқи эканини, аммо зўравонлик жиноят эканини таъкидлади.

“Намойиш – бу ҳуқуқ, зўравонлик эса жиноятдир ва бу қизил чизиқ демократик тараққиётимизнинг муҳим босқичида қатъий тортилади. Тартибсизлик уюштирувчилар ўз кўрликлари учун ҳуқуқий ва молиявий жавобгарликни тортиши шарт ва тортишади ҳам”, деб ёзди Рама ижтимоий тармоқларда ва намойишчиларни тартибсизлик иштирокчиларидан узоқроқ туришга чақирди.

Ҳокимият маълумотларига кўра, тўқнашувларда 300 га яқин киши жароҳат олган, уларнинг ярмидан кўпи полициячилардир.

Ҳукуматга қарши намойишлар Албанияда бир неча ойдан бери давом этмоқда. Тўқнашувлар ўтган ҳафта бошида, таълим ҳақининг юқорилигига қарши чиқаётган талабалар ҳаракати янги акцияларни бошлаганида кескин кучайди.

“Биз Рама истеъфога чиқмагунича ҳаракатимизни давом эттирамиз. Биз жиноятчи эмасмиз, биз жамоат тинчлигини ва мамлакатимизда яхшироқ яшаш шароитларини хоҳлаймиз. Зўравонлик ечим эмас, лекин ҳукумат ҳам бу намойишни тушуниш учун жиддий ўйлаб кўриши керак”, – деди намойиш иштирокчиларидан бири, 22 ёшли талаба Лека Сина.

Якшанба куни Европа комиссияси Албаниядаги зўравонликларни қоралаб баёнот берди ва унга “демократик жамиятда ўрин йўқлигини” ҳамда бериладиган жавоб “қонун доирасида ва мутаносиб бўлиши кераклигини” таъкидлади.