Россия Киевга баллистик ракета ёғдирди

Россия томонидан Украина пойтахти Киевга амалга оширилган тунги баллистик ракета ҳужуми натижасида давлат телерадиокомпаниясининг маркази нишонга олинди. Ҳужумда хабар маркази тўлиқ вайрон бўлди.

Freedom TV телеканали маълум қилишича, ҳужум тўғридан-тўғри Украина Давлат Халқаро Телерадио Ташкилоти офисларига қаратилган. Турли тилларда эфирга узатувчи давлат медиаси биноси катта зарар кўрган, хабар маркази эса деярли фойдаланиб бўлмас даражада йўқ қилинган.

Тун давомида Киевда эшитилган кучли портлашлар тонгга келиб осмонни қоплаган қоронғу тутунлар орқали кўзга кўрина бошлади. Ҳарбий маъмурият вакили Тимур Ткаченконинг маълум қилишича, ҳужум натижасида бир киши ҳалок бўлган, уч киши яраланган. Яраланганларнинг иккитаси шифохонага етказилган.

Фавқулодда хизматлар маълум қилишича, ҳужум қилинган ҳудуддаги мебель фабрикаси, кўп қаватли иш марказлари ва омборхоналар йўқ қилинган. Эълон қилинган суратларда ёнган вайроналар ва ойналари синган маъмурий бинолар акс этган. Портлаш марказига яқин жойда кимлиги ҳозирча аниқланмаган бир эркакнинг жасади топилган.

Украина Ҳаво кучлари маълумот беришича, мамлакат бўйлаб жами 23 та баллистик ракета ва 109 та дрон орқали ҳужумлар амалга оширилган. Улардан фақат 13 ракета ва 40 дрон уриб туширилган, қолган ҳужумлар эса 6 та минтақада катта вайронагарчиликка сабаб бўлган.

Херсон шаҳрида бир эркак дрон ҳужуми оқибатида ҳалок бўлди. Харьковда бошқариладиган бомбалар икки ватандошни яралади. Хмельницкий вилоятида тушган ракета парчалари бир аёлни яралаб, унинг уйини йўқ қилди.

Жума куни Кривой Рог шаҳрида 9 нафари бола бўлган 18 киши ҳалок бўлган ҳужумдан атиги икки кун ўтгач, янги ҳужумлар тўлқини Украина президенти Владимир Зеленскийнинг сабрини тугатди. АҚШ элчихонасининг Россияни тўғридан тўғри айбламайдиган баёнотига жавобан, Зеленский ижтимоий тармоқда қуйидаги сўзларни ёзди:

“Бу қадар қудратли халқ, бу қадар заиф реакция бера олмайди. Болаларни ўлдираётган ракеталар ҳақида гапирганда ‘Россия’ сўзини айтишдан ҳам қўрқишяпти.”