Немис шифокори беморларни оммавий ўлдиришда айбланмоқда

Германияда мамлакатнинг соғлиқни сақлаш тизимидаги энг йирик жиноятлардан бири бўлиши мумкин бўлган иш юзасидан тергов олиб борилмоқда.

Берлинда камида 15 кишини ўлдирганликда гумонланаётган паллиатив шифокор аллақачон ҳибсга олинган. Бу аввалги тахминларга нисбатан анча кўпроқ. Берлин прокуратураси 2025 йил 16 апрель, чоршанба куни 40 ёшли шифокорга нисбатан расман одам ўлдириш айбловини қўйди ва яна 75 ҳолат бўйича терговни давом эттирмоқда.

Тергов материалларига кўра, шифокор Берлинда паллиатив ёрдам хизматида ишлаган вақтида жиноятларни содир этган. Паллиатив шифокорлар даволаб бўлмайдиган касаллар дардини енгиллаштириш учун уларга тиббий ҳамроҳлик қилади.

Айблов 2021 йил 22 сентябрдан 2024 йил 24 июлигача бўлган даврдаги 15 та ҳолатни ўз ичига олади.

“Тергов натижаларига кўра, айбланувчи тиббий кўрсатмаларсиз ва беморларнинг розилигисиз 12 аёл ва 3 эркакка турли дори воситаларининг ўлимга олиб келувчи аралашмасини юборган. Энг ёш қурбон 25 ёшда, энг кекса қурбон эса 94 ёшда бўлган”, — дейилади хабарда.

Прокуратура айблов хулосасида нафақат одам ўлдириш жиноятини, балки унинг айниқса оғир хусусиятга эга эканлигини ҳам белгилашни талаб қилмоқда. Шунингдек, шифокорни махсус муассасада назорат остида сақлаш ва унга умрбод шифокорлик фаолияти билан шуғулланишни тақиқлаш масаласи кўриб чиқилмоқда.

Кўп ойлик тергов натижаларига кўра, прокуратура шифокорнинг ҳаракатларида шахсий манфаат ва айёрлик каби оғирлаштирувчи ҳолатлар мавжудлигини таъкидлаган. Илк пайтда жиноятнинг сабаби “ўлдириш ҳирси” деб баҳоланган эди, аммо кейин бу версия рад этилди, чунки шифокор, эҳтимол, фақат ўз беморларини ўлдирган, тасодифий одамларни эмас.

Айбланувчи 2024 йил августидан бери ҳибсда. Ўша пайтда у 4 беморни ўлдирганликда гумонланган эди. Тергов жараёнида 12 та жасад эксгумация қилинди ва суд-тиббий экспертизалар ўтказилди. Қурбонлар сони аввал 8, кейин 9 ва ҳозирда 15 нафарга етди.

Бу ҳам ҳали якуний рақам эмас, чунки ҳозирча 75 ҳолат бўйича тергов ишлари давом этмоқда. Яна 5 та жасадни эксгумация қилиш режалаштирилган.

Берлиндаги жиноий ишлар бўйича идорада махсус тергов гуруҳи тузилган. Терговчилар юзлаб тиббий ҳужжатларни ўрганиб чиққан. Парвариш хизмати ходимлари ва бошқа манбалардан олинган маълумотлар муҳим аҳамиятга эга бўлган.

Агар айбловлар тасдиқланса, бу ҳолат Германия тарихидаги энг йирик тиббий жиноятлардан бирига айланиши мумкин. Ҳозирча энг йирик шифокорлик жинояти сифатида 2019 йили 85 кишини ўлдирганлик учун умрбод қамоқ жазосига ҳукм қилинган Нильс Хёгел иши ҳисобланади. Унинг ҳаракатларига сабаб сифатида суд “ҳаяжон излаш”ни кўрсатган эди. Ундан олдин ҳам бошқа беморларни ўлдирганлик учун судланган эди.

Ҳозирда Ахен шаҳрида яна бир тиббий ходим устидан суд жараёни олиб борилмоқда — у Вюрзелен шаҳридаги клиникада 9 беморни ўлдириш ва яна 34 тасини ўлдиришга уринишда айбланмоқда.

2007 йили эса Берлинда “Шарите” клиникасининг собиқ ҳамшираси оғир касаллиги бўлган беш нафар беморни дорилар орқали ўлдиргани учун умрбод қамоқ жазосига ҳукм қилинган эди.