АҚШ ички хавфсизлик вазирини тунаб кетишди

Номаълум шахс АҚШ ички хавфсизлик вазири Кристи Ноэм овқатланаётган пайтда унинг сумкасини ўғирлаб кетди. Сумкада 3000 доллар нақд пул бўлган.

NBC News хабарига кўра, ҳодиса якшанба куни, 20 апрель куни кечқурун содир бўлган. Бу ҳақда 21 апрель, душанба куни, вазирлик вакили Триша Маклафлин телеканалга тасдиқ берди.

Вазиятдан хабардор икки манбанинг сўзларига кўра, ҳодиса Вашингтон марказида жойлашган Capital Burger ресторанида содир бўлган.

Журналистлар Неом нима учун ўзи билан бунча миқдорда нақд пул олиб юрганини сўраганида, Маклафлин бу катта байрамона оилавий кечки овқат эканини айтди.

«Унинг бутун оиласи шаҳарда эди — фарзандлари ва набиралари ҳам. У пулни оила аъзоларини меҳмон қилиш, дам олишни ташкиллаштириш ва Пасха байрами учун совғалар харид қилиш мақсадида ечиб олган», — деди вазирлик матбуот котиби.

Гувоҳларнинг сўзларига кўра, кечқурун N-95 тиббий ниқоб тақиб олган эркак ресторанга кириб келган, тепага чиқиб, Неом овқатланаётган жойга борган ва унинг столи ёнига ўтирган.

Кузатув камералари ёзиб олган видеода, у стулини секинлик билан сумкага яқинлаштиргани ва оёғи билан сумкани ўз томонига суриб олгани кўринган. Кейин у сумкани олиб, куртагининг ичига солиб, ресторандан чиқиб кетган.

Айни пайтда, жиноятчи айнан Кристи Неомни нишон қилганми ёки йўқлиги номаълум. Терговчилар у воқеа вақтида сумка кимга тегишли эканини билган-билмаганини аниқламоқда.

Манбаларнинг маълум қилишича, сумка ичида нақд пуллардан ташқари қуйидагилар ҳам бўлган: ҳукумат гувоҳномаси (бошқарма биноларига кириш ҳуқуқи берувчи), кредит карталари, чеклар бланкалари, паспорт, ҳайдовчилик гувоҳномаси ва калитлар тўплами.

Маълумотларга кўра, ресторанда вазир столидан эшик томонда АҚШ Махфий хизматининг камида икки нафар фуқаро кийимидаги ходими навбатда бўлган. Бироқ, вазирнинг тўғридан-тўғри ён-атрофида қўшимча агентлар бўлган-бўлмагани аниқ эмас. Гувоҳнинг айтишича, ўша пайт ресторанда одам кўп бўлмаган.

Материалда таъкидланишича, Кристи Неом — Дональд Трамп маъмурияти вакили бўлиб, у президентнинг ноқонуний мигрантларни депортация қилиш ва Мексика билан чегарани мустаҳкамлашга қаратилган қатъий сиёсатини қўллаб-қувватлаган.

Вазирлик лавозимини эгаллашидан олдин, у Жанубий Дакота штати губернатори ва АҚШ Конгресси вакили бўлган.