Илк бор Япония ҳукуматига аёл раҳбар бўлди

Япония парламенти тарихида илк бор аёл киши – Санаэ Такаичи – бош вазир лавозимига тасдиқланди.

21 октябрь куни мамлакат парламенти 64 ёшли Санаэ Такаичини Япониянинг 104-бош вазири этиб сайлади. У бундан олдинроқ ҳукмрон Либерал-демократик партияни (ЛДП) бошқарган эди. Маҳаллий ОАВларнинг ёзишича, "Такаичи энг кўп овозни олиб, 104-бош вазир этиб сайланди ва бу лавозимдаги биринчи аёл бўлади".

64 ёшли Санаэ Такаичи Либерал-демократик партиянинг энг таниқли сиёсий арбобларидан биридир. У 1961 йилда Нарада сиёсатга алоқаси бўлмаган оилада туғилган. Кобэ университети ва Мацусита бошқарув институтини тамомлаган. Ёшлигида рок мусиқаси ва мотоциклларга қизиққан, АҚШда конгресс аъзоси Патрисия Шредернинг аппаратида тажриба орттирган. Такаичи 1993 йилда биринчи марта парламентга сайланиб, тез орада ЛДП сафига қўшилган.

У ўзининг биринчи вазирлик лавозимини 2006 йилда Шиндзо Абэ ҳукуматида олган. Кейинчалик Ички ишлар ва коммуникациялар вазирлигига раҳбарлик қилган, шунингдек, Фумио Кисида кабинетида иқтисодий хавфсизлик вазири лавозимида ишлаган.

Такаичи ўта меҳнатсеварлиги ва қаттиққўл раҳбарлик услуби билан машҳур. У ўзини Маргарет Тэтчерга ўхшатиб, "темир хоним" деб атайди. У консерватив қарашларга амал қилади, Конституциянинг 9-пацифистик моддасини қайта кўриб чиқиш ва Ўз-ўзини мудофаа қилиш кучларининг ролини мустаҳкамлаш тарафдоридир.

2025 йил 4 октябрда Такаичи ЛДП етакчиси этиб сайланиб, Япониянинг энг йирик партиясига раҳбарлик қилган тарихдаги биринчи аёл бўлган эди.