Болгария президенти истеъфога чиқишини эълон қилди

Болгария президенти Румен Радев истеъфога чиқмоқда. Болгария халқига қилган мурожаатида у сешанба, 20 январь куни ишдан бўшаш ҳақида ариза беришини айтди.

Нашр ушбу материалда “bTV Новините” телеканали маълумотларини келтиради. Радевнинг фикрича, мамлакат вице-президенти Илиана Йотова “муносиб давлат раҳбари” бўлади.

“Вазият мени етти марта вақтинчалик ҳукумат тайинлашга, ўз ваколатларим доирасида давлат ва жамоат манфаатларини ҳимоя қилишга мажбур қилди. Бугун мен сизга Болгария президенти сифатида сўнгги бор мурожаат қилмоқдаман”, — деди Радев.

У 2017 йилнинг январидан бери, яъни тўққиз йил давомида президент лавозимини эгаллаб келмоқда. Радев ушбу давр мобайнида Болгария Европа интеграциясини якунлаганини, Шенген ҳудуди ва еврозона аъзосига айланганини қайд этди.

“Бу ерда савол шундаки, нега бу мақсадларга эришиш барқарорлик ва мамнуният келтирмади... Нега европалик Болгарияда одамларнинг катта қисми ўзини камбағал ҳис қилмоқда, янада кўпроқ қисми эса ноаниқликда яшамоқда. Мен жавоб қаттиқ сиёсий моделда эканини бир неча бор таъкидлаганман”, — дея қўшимча қилди Президент.

Унинг сўзларига кўра, бугунги Болгария сиёсати “институтлардан ташқарида содир бўлмоқда”. У партиялар, банклар, бизнес ва ОАВни эгаллаб олган ҳамда камералар қаршисида Миллий Мажлисга кўрсатмалар юборадиган “қўғирчоқбозларни” айблади.

Декабрь ойида Болгария ҳукумати баҳсли бюджет лойиҳаси туфайли келиб чиққан оммавий норозилик намойишлари фонида истеъфога чиққан эди. Президент ҳам бунга чақириб, мамлакат “қонун устуворлиги ва давлатчиликни тиклашга олиб келадиган ҳақиқий ўзгаришларга” муҳтожлигини айтган эди.

Ўша вақтда аҳолининг коррупциядан норозилиги ва кўплаб давлат секторларидаги муваффақиятсизликлар сабабли ҳукуматга қарши оммавий намойишлар бўлиб ўтганди. Намойишчилар ҳукуматнинг давлат сектори харажатларини ошириш мақсадида иш берувчилар учун ижтимоий солиқларни ва дивиденд солиғини кўтариш режаларидан норози бўлишган.

Сентябрь ойида Болгария Миллий Мажлиси депутатлари ҳукмрон кўпчилик овозлари билан махсус хизматлар раҳбарларини танлаш ҳуқуқини Парламентга берувчи тузатишларни қабул қилишган эди. Бунгача уларни Президент тайинларди.

Ўшанда Радев мамлакатнинг “мустабидлик ва талон-торожнинг қоронғи замонларига” қайтиш хавфидан огоҳлантирган ва овоз бериш жараёнини “асирга олинган давлат тимсоли ва коррупция маҳсули” деб атаган эди.