Сузувчи қишлоқ кулга айланди

Малайзиянинг Сабаҳ штатида якшанба куни юз берган йирик ёнғинда, кўпчилиги сув устида қозиқлар устига қурилган тахминан 1000 та ўзбошимча қурилган уйлар ёниб кетди. Расмийлар минглаб кишилар уйсиз қолганини маълум қилди.

Малайзиянинг Сабаҳ штати шимоли-шарқидаги Сандакан ҳудудида жойлашган “сув қишлоғи”да тонгги соатларда ёнғин чиқди. Бу ҳудудда Малайзиянинг энг қашшоқ қатламлари, маҳаллий жамоалар ва ватандошлиги бўлмаган кишилар зич ва ёғочдан ясалган уйларда яшашарди.

Сандакан хавфсизлик бошқармаси бошлиғи Жорж Абд Рақман воқеанинг “жуда катта миқёсда ва юракни тирнайдиган даражада” эканини ҳамда 9007 нафар кишига зиён етганини айтди.

Сабаҳ ўт ўчириш ва қутқарув департаменти ёнғин ҳақидаги хабарни 01:32 да олганини ва иккита станциядан 37 нафар ходим воқеа жойига жўнатилганини билдирди. Баёнотда ёнғин тахминан 10 гектар майдонга тарқалгани ва тахминан 1000 та вақтинчалик сузувчи уйлар тўлиқ ёниб кетгани таъкидланди.

Тор йўллар туфайли ўт ўчириш машиналарининг воқеа жойига етиб бориши қийинлашгани, сув сатҳининг пасайиши сабабли сув манбаларига эришиш ҳам чеклангани ифода этилди. Шунингдек, кучли шамол ёнғинни янада катталаштиргани айтилди.

Воқеада инсонлар ҳалок бўлмагани ёки жароҳатланмагани эълон қилинди ва хавф бартараф этилгани билдирилди.

Малайзия Бош вазири Анвар Иброҳим федерал ҳукумат Сабаҳ расмийлари билан келишув асосида эканини ва жабрланганлар учун вақтинчалик бошпана ҳамда ёрдам берилишини айтди. Бош вазир Анвар Facebook тармоғидаги постида “Биринчи навбатдаги вазифамиз – жабрланганларнинг хавфсизлиги ва воқеа жойида шошилинч ёрдам кўрсатишдир”, деган ибораларни қўллади.